Mis Ymwybyddiaeth o’r Menopos: Grymuso Sgyrsiau a Chefnogaeth

Rachel, Noward, Dee yn ‘Marginalised and Menopausal’

Hydref yw mis ymwybyddiaeth o’r menopos ac – fel un o feysydd ymgyrchu allweddol FTWW –buom yn brysur yn mynychu ac yn cynnal digwyddiadau ac yn canolbwyntio ar fywyd gyda’r menopos.

Roeddem wrth ein boddau i gael treulio Diwrnod Menopos y Byd gyda’n ffrindiau o Cysters yn eu digwyddiad ‘Marginalised and Menopausal’ rhagorol yng Nghaerdydd. Gwnaethom hefyd gynnal gweminar ar gyfer aelodau FTWW, ‘Managing Menopause Symptoms with CBT’, dan arweiniad Dr Dawn Owen DClinPsy, Eiriolwr Menopos a Phrif Seicolegydd Clinigol Gwirfoddol FTWW. Cafodd Lisa Nicholls, Cyd Eiriolwr Menopos Gwirfoddol FTWW, ei chyfweld hefyd gan Jason Mohammed o BBC Radio Wales...

'Marginalised and Menopausal'

Diolch anferthol i’n ffrindiau yn Cysters am ein gwahodd i gymryd rhan yn eu digwyddiad gwych, ac angenrheidiol iawn, ‘Marginalised and Menopausal’, a gynhaliwyd ddydd Sadwrn 18 Hydref, Diwrnod Menopos y Byd.

Gwnaethom fwynhau diwrnod cynhwysol yn archwilio’r menpos ac iechyd ym mhob cymuned, gan wrando ar brofiadau llefarwyr, dal i fyny gyda’n ffrindiau o stondinau eraill, gan gynnwys Musilm Doctors Cymru ac Endometriosis UK, i drafod atebion, a mwynhau’r samosas mwyaf blasus!

Thema eleni yw ‘Meddygaeth Ffordd o Fyw’, ac roedd yn wych clywed gan fwy o’r llefarwyr am y gwahanol ddulliau y gall cleifion eu defnyddio i deimlo mor dda â phosibl yn ystod y menopos, o HRT i ymarfer corff, deiet, llesiant meddyliol, a phopeth yn y canol!

Os hoffech ganfod mwy am Ddiwrnod Menopos y Byd, ewch i wefan yr International Menopause Society.

Rheoli Symptomau’r Menopos gyda therapi gwybyddol ymddygiadol

Rydym oll yn gwybod nad yw symptomau’r menopos ‘yn ein pennau yn unig’ ac y gallant gael effaith wirioneddol ar ein llesiant corfforol a meddyliol.

Er nad yw’r menopos yn ei hunan yn salwch, rydym yn gwybod y gall effeithio ar holl systemau ein corff, felly mae angen i ni gael mynediad at yr holl offer sydd ar gael i sicrhau bod gennym y dulliau i lywio drwy’r cyfnod pontio hwn mewn bywyd, a dim ond un o’r dulliau hyn yw Therapi Gwybyddol Ymddygiadol.

Diolch yn fawr iawn i Dr Dawn Owen DClinPsy, Eiriolwr Menopos a Phrif Seicolegydd Clinigol Gwirfoddol FTWW, am ddarparu gweminar gwych ar gyfer aelodau FTWW yn cwmpasu therapi gwybyddol ymddygiadol a sut y gall ein helpu i gymryd rheolaeth o sut rydym yn ymateb ac yn ymdrin â’r ffyrdd gwahanol y byddwn yn profi effaith y gwahanol gamau o’r menopos.

Yn dilyn ei phrofiad niweidiol o’r perimenopos/menopos llawfeddygol, mae Dawn wedi gweithio gyda FTWW fel gwirfoddolwr yn hyrwyddo’r angen am ofal menopos gwell fel y gall menywod a phobl a bennwyd yn fenywaidd adeg eu geni osgoi gofid diangen. Rydym yn hynod ddiolchgar iddi am bob dim y mae’n ei wneud – diolch, Dawn!

Os nad ydych yn aelod o FTWW eto ond hoffech fod, ymunwch â’n grŵp Facebook yma – gwnewch yn siŵr eich bod yn ateb yr holl gwestiynau ymuno fel y gallwn roi mynediad i chi.

BBC Radio Wales ‘The Phone In’

“Pe byddwn wedi gwybod mwy am y menopos, ac wedi paratoi’n well i ddelio â’r arwyddion a’r symptomau, byddwn wedi gallu cael sgwrs fwy agored a gonest gyda fy nghyflogwr” - Lisa, Eiriolwr Menopos Gwirfoddol FTWW, yn siarad â BBC Radio Wales

Yn ogystal ag ymuno â ni yn y sesiwn ‘Marginalised and Menopausal’, cymerodd Lisa Nicholls, Menopos Gwirfoddol FTWW, amser hefyd i siarad â Jason Mohammed ar ‘The Phone In’ BBC Radio Wales ar 20 Hydref. Dilynodd y sgwrs lansiad y ddrama gomedi, ‘Riot Women’, sy’n dilyn 5 o fenywod canol oed sy’n ffurfio band pync ac yn chwalu mythau am y menopos!

Siaradodd Lisa am ei phrofiad gyda diffyg cwsg, niwl ymennydd, a cholli hunanhyder wrth iddi frwydro i gynnal ei gyrfa yn ystod cyfnod pontio’r menopos. Dywedodd wrth y gwrandawyr, “Pe byddwn wedi gwybod mwy am y menopos, ac wedi paratoi’n well i ddelio â’r arwyddion a’r symptomau, byddwn wedi gallu cael sgwrs fwy agored a gonest gyda fy nghyflogwr…Pan ganfyddais FTWW, dyna’r tro cyntaf i mi siarad â phobl a allai uniaethu â’r profiadau roeddwn yn eu profi”.

Bu Lisa yn wirfoddolwr i FTWW am dros chwe blynedd, ac mae wedi cyfrannu at waith hanfodol ar y menopos. Diolch yn fawr iddi am bob dim y mae’n ei wneud i godi ymwybyddiaeth o’r menopos a FTWW, ac yn helpu i newid pethau er gwell!