FTWW yn mynd i Gyfarfod Blynyddol y Gydweithfa Iechyd

Mae'r Gydweithfa Iechyd yn fenter sydd dan arweiniad Wellbeing of Women, sy'n cynnwys gweithwyr gofal iechyd proffesiynol a mudiadau llawr gwlad sy'n gweithio ym maes iechyd menywod, gyda'r nod o wella gofal iechyd i fenywod sydd ar y cyrion a phobl a ddynodwyd yn fenywod pan y’u ganed. Roedd yn bleser gan Dee o FTWW fynychu’r cyfarfod blynyddol eleni yn Llundain ar 12 Tachwedd.

Cyflwynwyd y sesiwn groeso gan y Cyd-gadeirydd, Dr Nighat Arif, cyn i'r rhai a oedd yn bresennol gynnal sesiwn i adolygu’r brand a rhoi adborth. Ar ôl cinio a chyfle i rwydweithio, ymunodd Kendall Jamieson Gilmore o Adran Iechyd a Gofal Cymdeithasol Llywodraeth y DU â'r Gydweithfa; mae'r adran hon yn rhan o'r tîm sy'n gweithio ar Strategaeth Iechyd Menywod Llywodraeth y DU.

Roedd Dee yn awyddus i wybod a yw timau Llywodraeth Cymru a Llywodraeth y DU yn cydweithio ar eu priod gynlluniau, yn enwedig mewn ffyrdd a fydd yn lleihau'r rhwystrau lu sy'n bodoli i gleifion yng Nghymru a allai fod angen cael gafael ar ofal o'r tu allan i'w bwrdd iechyd ac yn Lloegr. Byddwn yn parhau i godi'r mater hwn fel un o’r prif ffactorau sy’n achosi’r anghydraddoldeb iechyd y mae cynifer o'r rhai rydym yn eu cefnogi yn ei wynebu, gan gynnwys fel rhan o'r gwaith a wnawn i weithredu Cynllun 10 mlynedd Iechyd Menywod GIG Cymru.

Yna trafodwyd yr hyn sydd ei angen gan gam nesaf Strategaeth Iechyd Menywod Llywodraeth y DU, cyn cael sesiwn ar ddod o hyd i atebion i broblemau cyffredin.

FTWW oedd yr unig sefydliad o Gymru yn yr ystafell, felly byddwn yn cydweithio â'r Gydweithfa Iechyd i sicrhau bod mwy o sefydliadau llawr gwlad yng Nghymru yn cael gwahoddiad i ymuno. Yn y cyfamser, gallwch gael rhagor o wybodaeth am y Grŵp a sut i gymryd rhan.

O’r adborth gan aelodau eraill y Gydweithfa Iechyd gwelwyd bod llawer yn ddiolchgar am ein mewnbwn a’u bod wedi dysgu cymaint oddi wrtho; nid oedd llawer wedi sylweddoli bod cymaint o wahaniaethau i’w cael rhwng systemau'r GIG mewn gwledydd datganoledig, a dywedodd Dr Nighat fod y sgyrsiau'n llawer cyfoethocach oherwydd ein presenoldeb a'n cyfraniadau ni.

Diolch o galon i dîm y Gydweithfa am wneud ein cyfraniad yn bosibl ac yn rhwydd.