Roedd FTWW yn falch o gynnal hystings bywiog ar-lein ar y pwnc 'Gwneud i Iechyd Mislifol Gyfri yng Nghymru', cyn etholiadau’r Senedd fis nesaf. Cynhaliwyd hyn mewn partneriaeth ag Endometriosis UK, gyda chefnogaeth Cysters, Cymdeithas Ryngwladol Anhwylderau Cyn Mislifol (IAPMD) y DU, y Gynghrair Iechyd Mislif, Coleg Brenhinol yr Obstetryddion a'r Gynaecolegwyr, Cymorth Endometriosis Abertawe a Phen-y-Bont ar Ogwr, Cymuned Menopos De Cymru a Phrifysgol Gorllewin yr Alban.
Y mis hwn, bu FTWW yn gweithio gydag Endometriosis UK i gynnal digwyddiad hystings ar-lein, 'Gwneud i Iechyd Mislif Gyfri yng Nghymru' cyn Etholiadau'r Senedd yn 2026.
I gydnabod yr amrywiaeth eang o broblemau iechyd mislif sy’n effeithio ar boblogaeth Cymru, cefnogwyd y digwyddiad gan amrywiaeth o sefydliadau sydd ag arbenigedd yn y maes hwn: Cysters, Cymdeithas Ryngwladol Anhwylderau Cyn Mislifol (IAPMD) y DU, y Gynghrair Iechyd Mislif, Coleg Brenhinol yr Obstetryddion a’r Gynaecolegwyr, Cymorth Endometriosis Abertawe a Phen-y-bont ar Ogwr, Cymuned Menopos De Cymru, a Phrifysgol Gorllewin yr Alban. Bu pob un ohonynt yn ddigon caredig i rannu blaenoriaethau eu sefydliadau ar gyfer iechyd a llesiant mislifol.
Dan arweiniad Selma Chalabi, sydd wedi bod yn gynhyrchydd cyfryngau darlledu a newyddiadurwr am 20 mlynedd, ymunodd ymgeiswyr o’r Blaid Werdd, Plaid Cymru, Reform UK, Llafur Cymru, a Democratiaid Rhyddfrydol Cymru â’r drafodaeth, gan ateb cwestiynau’r rhai a oedd yn bresennol am bopeth sy’n ymwneud ag iechyd mislif ac amlinellu beth mae eu pleidiau’n bwriadu ei wneud os byddant yn ennill Etholiad y Senedd ar 7 Mai.
Roedd y pynciau’n cynnwys oedi diagnostig; hyfforddiant i weithwyr gofal iechyd proffesiynol; rhestrau aros gynaecoleg; effaith symptomau a chyflyrau iechyd mislif ar addysg, cyflogaeth, a’r economi; buddsoddiad mewn hybiau iechyd menywod a staff y GIG; mynd i’r afael â loterïau cod post at ofal arbenigol, a’r angen am ymchwil i fynd i’r afael ag anghydraddoldebau iechyd.
Roeddem yn falch iawn o glywed ymrwymiadau'r ymgeiswyr i wneud iechyd menywod yn fater trawslywodraethol ac rydym yn bwriadu mynd ar drywydd hyn gyda phwy bynnag a etholir ym mis Mai i sicrhau bod hyn yn aros yn flaenoriaeth.
Yn y cyfamser, diolch i’r holl ymgeiswyr am gyfrannu at drafodaeth ardderchog, ac i bawb a gymerodd ran ac a gyflwynodd gwestiynau. Hoffem hefyd gofnodi oherwydd problem dechnegol nad oedd Laura Anne Jones o Reform UK Cymru wedi gallu cyfrannu am 25 munud cyntaf y digwyddiad ond roedd hi’n bresennol yn y gynulleidfa ac wedi ceisio ymuno o’r cychwyn. Cafodd y broblem ei datrys cyn gynted â phosibl – diolch i bawb am eu hamynedd.
Gallwch weld y digwyddiad Hystings yma:
Cymraeg 
English (UK)