Lleisiau Gynecoleg

Mae 'Lleisiau Gynecoleg' yn sicrhau bod lleisiau defnyddwyr gwasanaethau yn ganolog yn y broses o wneud penderfyniadau mewn gwasanaethau gynecoleg yng Nghymru.

Mae'n dod â chleifion, staff gofal iechyd a rhanddeiliaid eraill at ei gilydd i gynllunio, adolygu a gwella gofal gynecolegol.

Cip...

• Mae FTWW yn gweithio gyda Llywodraeth Cymru a chlinigwyr gofal iechyd i sicrhau bod profiadau menywod, merched a'r rhai a gofrestrwyd yn fenywod ar adeg eu geni yn dylanwadu ar ddatblygiad gofal gynecolegol.
• Ein nod yw datblygu fforymau 'Lleisiau Gynecoleg' sy'n dod â chleifion, staff gofal iechyd a rhanddeiliaid eraill at ei gilydd ymhob bwrdd iechyd yng Nghymru.
• Yng Ngogledd Cymru, rydym ni wedi helpu i sefydlu a chynnal fforwm Lleisiau Gynecoleg sydd â chefnogaeth timau uwch reoli ym Mwrdd Iechyd Prifysgol Betsi Cadwaladr.
• Gall fforymau Lleisiau Gynecoleg arwain at welliannau o ran diogelwch, ansawdd a phrofiad o ofal gynecolegol.

Sut dechreuodd Lleisiau Gynecoleg?

Mae Lleisiau Gynecoleg yn seiliedig yn fras ar y model a oedd eisoes yn cael ei ddefnyddio mewn Gwasanaethau Mamolaeth a Newyddenedigol yng Nghymru a Lloegr, i helpu darparwyr gofal iechyd a chlinigwyr i glywed yn rheolaidd gan ddefnyddwyr gwasanaethau a gwneud yn siŵr bod y gofal a gynigir yn diwallu eu hanghenion.

Yng Nghymru a Lloegr, mae Partneriaethau Lleisiau Mamolaeth a Newyddenedigol yn bodoli, weithiau'n cael eu talfyrru i MNVP neu 'Leisiau Mamolaeth'. Mae'r rhan fwyaf o Ymddiriedolaethau'r GIG yn Lloegr ag MNVP, ac mae Llywodraeth Cymru yn cefnogi eu datblygiad ymhob Bwrdd Iechyd yn Lloegr.

Mae MNVP yn gwrando ar brofiadau menywod a theuluoedd, ac mae'n dod â defnyddwyr gwasanaethau, staff a rhanddeiliaid eraill at ei gilydd i gynllunio, adolygu a gwella gofal mamolaeth a newyddenedigol. Mae MNVPau yn sicrhau bod lleisiau defnyddwyr yn ganolog wrth wneud penderfyniadau mewn gwasanaethau mamolaeth a newyddenedigol.

Mae FTWW wedi cefnogi Tîm Polisi Mamolaeth a Newyddenedigol Llywodraeth Cymru i ddatblygu Fframwaith Ymgysylltu Amenedigol a fydd yn rhoi arweiniad i fyrddau iechyd ar sut i sefydlu a darparu adnoddau ar gyfer MNVPau, i gydnabod eu gwerth yn sicrhau bod gwasanaethau'n rhoi'r unigolyn yn ganolog.

Mae FTWW a'r clinigwyr rydym ni'n gweithio â nhw yn cydnabod bod rhai o'r materion a drafodwyd mewn fforymau ac adborth Lleisiau Mamolaeth yn cael eu trosglwyddo i ofal gynecolegol, ee colli beichiogrwydd (camesgoriad) fwy nag unwaith, cyflyrau a thriniaethau gynecolegol, iechyd meddwl amenedigol, a heriau a gwasanaethau ar gyfer ffrwythlondeb. Credwn ei bod yn bwysig i leisiau menywod gael eu clywed yn y mannau hyn yn ogystal ag mewn gofal mamolaeth a newyddenedigol.

Beth yw Fforwm Lleisiau Gynecoleg?

Mae Fforwm Lleisiau Gynecoleg yn canolbwyntio ar gynecoleg ac yn cyfateb i MNVP. Dylai fod yn lle adeiladol sy'n dod â chleifion a gweithwyr gofal iechyd proffesiynol at ei gilydd, er mwyn i gleifion allu rhannu eu profiadau a'u safbwyntiau, a chydweithio i ddatblygu gwybodaeth a dulliau i ofalu sy'n diwallu anghenion cleifion.

Gall fforymau Lleisiau Gynecoleg arwain at welliannau o ran diogelwch, ansawdd a phrofiad o ofal gynecolegol.

Gall helpu i wneud yn siŵr fod y byrddau iechyd yn blaenoriaethu'r pethau cywir wrth ddarparu gwasanaethau gynecoleg, a bod yr wybodaeth, yr hyfforddiant a'r gofal a gynigir wedi cael mewnbwn gan gleifion fel eu bod yn diwallu eu hanghenion. Gall hyn hefyd helpu i wella effeithlonrwydd a lleihau gwastraff.

Ym Mwrdd Iechyd Prifysgol Betsi Cadwaladr, mae FTWW wedi helpu i sefydlu a chynnal Fforwm Lleisiau Gynecoleg, sy'n bodoli ers 2020. Mae'n cael ei gyd-gadeirio gan weithiwr gofal iechyd proffesiynol yn gweithio yn yr arbenigedd gynecoleg a chynrychiolydd cleifion. Mae FTWW yn helpu i godi ymwybyddiaeth am y fforwm drwy rannu gwybodaeth â chleifion Gogledd Cymru yn ein cymuned ar-lein a'u cefnogi i fynychu a dweud eu dweud.

Sut mae Fforwm Lleisiau Gynecoleg yn cael ei gynnal?

Dylai Fforymau Lleisiau Gynecoleg gael cefnogaeth yr uwch dimau rheolau yn y byrddau iechyd fel bod yr hyn a gaiff ei drafod yn cael ei werthfawrogi'n iawn ac yn dylanwadu ar y broses o wneud penderfyniadau.

Yng Ngogledd Cymru, mae'r Fforwm Lleisiau Gynecoleg

• Yn cwrdd yn rheolaidd, unwaith bob chwarter, ar-lein (dros Teams)
• Yn cytuno ar agenda, cofnod o gamau gweithredu, a chofnodion
• Yn parhau i ymgysylltu y tu allan i'r cyfarfodydd bob chwarter, ee wrth ddatblygu gwybodaeth i gleifion neu achos busnes
• Yn cael ei gynrychioli yng nghyfarfodydd misol Bwrdd y Gyfarwyddiaeth Menywod
• Yn llunio adroddiadau bob dau fis i'r Bwrdd
• Yn cynnwys logo, cyfeiriad e-bost a gwybodaeth ar wefan y bwrdd iechyd

Newyddion am Leisiau Gynecoleg